Sunday, August 15, 2010

熊黛林KO港女Zoie

今日個topic想寫好耐, 想講下港女, 一直都冇乜心機寫, 趁住一個天陰陰既下午, 一個冇囡囡約我出街既星期日, 所以我就閂埋房門, 然後.....

話說, 有一晚, 打開電視, 睇有線娛樂台

有一個節目叫歐洲四部曲, 係個旅遊節目, 風格似discovery channel嗰類, 主持主導個節目, 講下文化、識下當地人, 諸如此類

咁我睇嗰集, 就係有熊黛林同埋有線主播Zoie 譚凱琪(大家可能會問, 譚凱琪係乜水?自己wiki la~), 去西班牙巴塞隆拿, 香港人識隊波多過個地方, Kreme都係因為戴志偉踢巴塞, 高橋洋一有講先知多少少

講番個節目, 北方佳麗同港女做同一個節目, 港女點都要顯示下港女優越性!!!

之不過, 咁又好似對Zoe唔太公平, 話哂熊黛林因為做左郭富城條女而紅左, 但就算唔係咁, 但係當你既對手係熊黛林, 點都會蝕底D, 熊黛林喎!!!


好勒, 身裁同樣都係天生, 輸蝕都冇計, 後天可以學到既禮儀、見識等等, 都輸埋俾熊黛林, 就真係對已出現剩女危機既港女擔心

咁果個節目係去巴塞隆拿, 當地人熱情, 鐘意足球呢類一大班人玩既活動, 幾杯酒落肚, 一大班麻甩佬自不然對女仔毛手毛腳, 明既

咁啱, 兩位女士去到拍外景, 撞到開波/完場, 好多男人走出球場, 見到有亞洲女性, 雄性荷爾蒙驅使下, 自然走去撩佢兩位

熊黛林始終都係Top Model, 見過細面, 有一班西班牙佬經過, 佢就同佢地握手、鍚面, 一眾鬼佬見到已得甜頭, 加上對方大方自然(重點!), 咁就知情識趣咁由熊黛林繼續拍攝

同一國家, 另一外景, 港女Zoie遇到同一情況,但 就冇熊黛林咁冷靜, 好多鬼佬見佢細細粒粒鬼咁可愛, 就哄埋去, Zoe立即變身做咸蛋超人:出十字死光!

唔明?即係好似咁:

攔住個鬼佬, 兼且尖叫...

結果, 因為你反應咁大, 咁好玩, 成個俾人環腰抱起左

原先出死光係覺得唔想被人博朦, 結果反而仲狼狽, 仲要上埋鏡, Kreme覺得佢好陰公....

更陰公係, 普遍港女不齒既大陸女人, 覺得大陸女人幾靚都好, 都會粗魯/冇教養/冇見識, 但今次卻係大陸女人連人帶波KO港女...(當然, Zoie應該冇咁諗)

剩女危機, 內地競爭, 原來最後要戰勝既都係自己內心既心胸與見識, 喺Zoie既尖叫聲之中, 我聽到港女們心中對未來的恐懼

PS Zoie都幾正. 有冇得救?一定有!

●去到印度都不忘宣揚香港文化, 呢亭女仔又點會做剩女呢?

1 comment:

  1. zoie咁搞鬼?十字死光都出埋?hahahahahaha

    其實大陸都有唔少有教養o既女仔。

    ReplyDelete