三等公民

尹思哲寫左篇三等公民, 問"如果要移民，港人可以去邊度，又有邊度比香港好？"

問心, 講搵食, 其實全世界冇乜邊度好似香港咁多搵食機會.

成日有啲政棍走出嚟話, 香港今日好難捱, 第四代好難上位!

香港今日好難捱, 但平均工資講緊既係一萬蚊, 仲要唔計經理級, 已經有一萬蚊, 難搵食? 定係閣下唔想付出但係要求高?

有人話物價貴, 其實一河之隔, 深圳物價已經爭好遠, 平好多, 撘直通巴上北啲, 大陸人幾威都好, 普遍上, 閣下香港人已經有錢過大陸人十倍, 人地人均一千左右炸.

有人話, 第四代好難上位! 我想問, 第一代, 第二代, 第三代, 唔通自然上位? 唔通唔使做就上到位? 點解大家有錯覺以前易啲上位, 係因為以前得1%入到大學, 有好多人未讀完書已經無法透過打工上位, 只好迫住搞生意, 其實上一代要上位一樣咁難, Opps, 當年英國佬渣旗, 上升真係咁易? 好似「小飛俠才子」咁講到人地自然上位?

又有人話, 上一代買匯控、買樓, 就係必贏方程式, 今日冇呢支歌係唱. 用今日角度, 好似係必然, 但係當年利率係P+, 全球資金流動遠不及今日,買樓借錢隨時20厘, 買以上既野全部都要一筆過, 加諸當年仲有土共暴動, 中英談判, 前景不明, 夠膽買既, 都係贏膽色, 你今日睇番匯控股價圖, 就話人地當年好易炒, 係咪馬後炮呢?

今日借錢又易, 投資市場廿四小時開放, 有能力, 有眼光, 十五分鐘已經可以夠退休, 今日恒指升成七百點, 夠膽買期指, 你已經係小富翁. 唔夠膽, 冇問題, 但又怨社會唔俾機會你, 其實係你自欺欺人, 係你冇俾機會自己, 唔怪得人.

再講, 做生意, 當年陀地係陀地, 差佬係陀地, 消防都係陀地, 當年個世界真係咁易上位?

講返正題, 香港係全球最高度發展既資本主義社會, 最唔缺乏就係錢, 都幾難搵到個好似香港咁多搵食機會既地方, 上一代所謂易上位, 其實係假象, 大家面對唔同既問題.

與其怨香港, 怨社會, 怨第四代, 不如將精力花喺賺錢上面, 儲夠錢(呢個難啲), 或者一注獨贏有筆錢(呢個一半半, 一半發, 一半破產, 但至少有個機會), 再移民去一個自己最鍾意既地方, 一等三等, who cares?自己揀既, 開心咪得囉!

PS「小飛俠才子」有幾篇怨婦文章, 有機會hyperlink左佢