Krispycrap

Tuesday, October 20, 2009

全球暖化都敵唔過人情冷暖

辭職吧，邱騰華！

From Pakman

突然間覺得邱騰華有少少可悲

佢幫左綠膠份子做旗手咁耐, 家下出事, 一眾綠膠即刻割席,

"筆者翻查資料，綠色和平、地球之友和環保觸覺都贊成採用慳電膽"

綠色和平、地球之友割席

環保觸覺變左長實觸角

真係人情冷暖.

不過邱騰華揀做綠膠打手, 咁死蠢, 抵死!

Sunday, October 18, 2009

無恥醫生

特首講樓市, 本來政治場上兵戎相見, 被批評唔理窮人, 係好正常, 點知今年有一班特區寄生蟲、本身已經恃住政府特權壟斷發財既醫生, 喺電台、報紙、blog大喊冇錢買樓.

有個醫生寫左一堆字, 怨曾蔭權唔施捨幾個錢畀佢買樓.

唔係咁蠢雅? 唔識將貨就價? 特首好心提佢地可以住遠少少, 竟然話太遠唔就腳,一定要九龍港島先肯住(其實都夠買有突), 間樓住新界襯唔起高高在上既醫生身份. 真係恐怖.

香港醫生一早已經唔高尚, 特別係公家醫生, 下下想加人工既時候, 就擺病人上枱.

本來手術刀在前, 有機會睇醫生既香港人都唔會亂鬧醫生, 以免有醫生唔小心醫死人, 而嗰嗰人又咁啱係你

點知, 醫生連醫院以外既一般人生活都唔放過, 要再据香港人一頸血.

醫生喺香港最壟斷既行業, 唔喺香港兩間大學出黎, 呢世都唔使旨意合法執業, 就算你係哈佛醫學教授, 都好難pass個試, 目的係同你講: 過主啦, 呢度我地頭! 學中醫, 要面對西醫瘋狂抹黑, 又話唔科學又盛, 總之只準睇西醫, 但唔準問咁多. 原則上, 醫生組織同黑社會無疑, 分別係一個政府授權, 一個要劈友劈個場返黎.

喺冇乜競爭既情況下, 醫生收入超穩定, 中意就打政府工, 唔中意就自己執業. 咁啱, 供樓最需要穩定收入, 醫生就最適合供樓供舖. 好多醫生都係自置舖.

點知, 家下醫生不思進取, 更不知廉恥, 嫌豪宅貴, 竟然要求政府推冧摟市.

有收入供得起, 負資產都冇事, 最慘一般商界打工仔, 市一差就有機會被炒, 工又冇, 樓又負資產, 最後只會益左班收入超穩定既人, 就係醫生, 就算佢地高追都冇問題, 因為供得起, 市冧仲可以執平貨, 入多間.

香港市民究竟前世係咪欠左班醫生? 醫病冇得揀, 迫住捱貴夾唔抵既本地醫生; 有D醫生冇得外國供應, 佢退休就成個部門摺埋. 家下醫生連樓市都要打主意. 當香港的土地不再屬於香港的新一代，只屬於醫生此等特權階級, 你教我們怎會對這城市有歸屬感？

肥醫生, 請你回答我, 如果如你所願, 樓市冧左, 有個病人, 去你度睇病, 話變左負資產後, 積勞成疾, 你會點同佢解釋?

敬候您的回覆,

Kreme

Saturday, October 17, 2009

電燈膽

任何「環保」政策，都係搵個好名去推，實際就係利益輸送，難委香港有班叫公民黨既人，任何政策加「環保」兩個字上去就舉腳支持，做大律師都蠢過人。

Monday, October 12, 2009

買左部Netbook

大家一睇條題, 一定以為我想學尹思哲咁講下部Netbook有咩咁勁, 其實Kreme鬼識講咩, Kreme只係想講下買既過程.

因為之前都格過幾間價, 去到林收工之際, 走左入一間百老匯, 我好似原始人咁問, 因為對Kreme嚟講, 世界仲停留喺Notebook年代, netbook成部玩具咁, 問長問短咁, 個promoter 好有耐性咁sell. 最後決定買部HP, 貪佢D制夠大, 好似阿伯買電話咁...

到就畀錢,終於有位sell屎走黎吹下水, 我見佢份人冇乜點咪同佢吹下, 點知幾玩得, 之後要我填evaluation, 喺購買原因, 我忍唔住自己加多欄, 叫「員工好friendly」,

之後佢地打蛇隨棍上, 仲叫我寫感謝信, 我當然當甜估咁寫, 笑到佢地同事卡卡聲, 我諗都冇幾多個人肯咁玩野, 希望都仲幫到佢兩位, 唔會上頭一句話「份野係咪玩野架」, 而令佢地冇左張百佳現金券(有人感謝佢,員工就有現金券當獎勵, 多寫多送, 送完不止) .

最後, 大家可能會問:「咁呢個故事有乜教訓」唔...Kreme 未諗到, 純粹分享下jer~

(嘩,呢篇野好xanga)

Friday, October 9, 2009

黃毓民老闆無恥、無良、無知

最近網上流傳一段"毓民勁插何民傑後面"既youtube片,黃毓民老闆大罵西貢區區議員何民傑係唔成熟既右派,雖然黃老闆振振有詞, 但講左5,6分鐘,都仲未答到何民傑所講,最低工資搞到新移民婦女失業點算, 只係一味貶低何民傑,並且利用議會規則,自己講哂,唔畀人回應.

黃老闆當日話李慧瓊冇畀涂謹申講野,話民建聯最無恥, 今日又唔畀提供意見既人士回應, 咁Krispycrap又可唔可以話「社民連最無恥」呢?

不過,商家背景既黃毓民老闆似乎不知民間疾苦, 竟然講得出「揾三千要去拎綜援」,黃老闆, 人地有手有腳,肯去做,有咩問題?點解你要立法最低工資去剝削人地工作權利?

唔通黃老闆覺得揾三千蚊既人好銀眼,恨不得除之而後快?不論佢用心係點,黃毓民老闆真係好無恥. 搞到人失業, 係無良. 人地話最低工資會搞到人失業都唔識答,係無知.

唔怪得人做老闆佢做老闆, 佢做親老闆都仆街啦! 搞癫狗日報, 搞到爭人周身債, 到搞cyber日報, 又仆街收場. 今日佢做咩生意?nonono, 唔係牛肉麪, 而係賣社會主義. 你覺得黃毓民真係相信社會主義咩? nonono,佢成副身家多過我同你地幾廿個人加埋, 共佢產佢仲得了, 佢就最驚香港有查維斯上台嘞.

不過, 因為香港有佢把口最憎既自由市場, 佢每一次仆街, 都可以憑自己努力再爬番上黎,無論佢幾憎市場都好,佢今日得到既一切, 都係嚟自市場.

黃毓民老闆係個大資本家, 如果佢咁唔相信人有累積財富既權利, 點解唔先將自己副身家分畀人呢? 唔好分得多, 分一半, 亦都唔好分畀我, 分畀社民連D 0靚,你班0靚免費幫你打江山宣傳, 黃老闆你咁疊崩,一個仙都唔分畀你班0靚, 似乎講唔通喎!

最後, 黃毓民老闆最討厭地產資本家, 有一個地產資本家,叫施永青, 佢已經決定死後將大部份身家捐出, 黃毓民老闆咁大義澟然, 又咁豪爽, 冇理由捐得少過呢啲吸血鬼掛. 嘩哈哈哈哈!

伸延閱讀: